VORWORT JETZT GRIASS GOTTLE! Ha, des find i jetzt echt subber, dass ihr eurer Lieblingspizzagosch glei beim erschta Abenteuer uff Schwäbisch über d' Schulder glotza wellet. I kô eich saga, dass i grad Schpass han wie mit 'ra Gosch voll Reißnägl. Zum oina, weil mei spennedr Kumbl, d'r Spidey, a bissle Malär mit 'ra - i sag môl - paranoida Episode hôdd ond deshalb im Moment mehr Daggel als Schpenn isch, ond zom andra sauet dôhanna der bleede Nôchmacher, 's Chamäleon, durch d' Gegend ond macht uff Mimikri, was so viel hoißt wia der macht glei bloß no mimimi, wenn i den môl endlich in d' Fenger kriag... des kô i eich versprecha. D'rzua kommt au no so an dauber Schlanga-Siach, der moint, er könnt mit de große Hond bronza, aber halt d'r Haxa edd nuff kriagt ond deshalb am End doch bloß no a Blendschleich isch... Ihr sehet also... 's isch viel zum doh... Deshalb isch jetzt au gnuag gschwätzt ond i wünsch eich donderschlächtig viel Schpaß beim Zuagugga... weil wie hoißt's so schee auf guat Schwäbisch? Schaffa, schaffa, Mäusle haua...

Wenn ihr des jetzt no edd uff Ôhieb verschtanda hend, misset 'r halt endlich des Gschichtle lesa, ihr alde Tranfonzla. Dangge Ade